Faxriddin Hayit. G‘alaba
G‘alaba nima u?
Birovning ko‘ksin qonatib
vayron qilmoq emas dil ayvonini.
Yo omon boshiga toshlar qulatib
parchalab tashlashmas ustuxonini.
Achchiq yosh qalqitib ma’yus ko‘zlarda
Nozik bilaklarni qayirmoq emas.
E voh, yuragiga tekkan daydi o‘q,
onani boladan ayirmoq emas!
Vayron qilmoq emas ko‘chalarini,
uylarini buzmoq – g‘alaba emas.
Xatarga to‘ldirib kechalarini
jonlarini uzmoq – g‘alaba emas.
Nomardlar, nodonlar
qing‘ir yo‘l bilan
Tokaygacha topgay pinhona zafar?!
Birovning bog‘ini o‘zga qo‘l bilan
payhon etganlarga begona – zafar!
G‘alaba –
Maydonda raqibin yiqitib so‘ngra
Kiftiga o‘zbekcha qoqib qo‘ymoqlik.
Ulkan zafar quchib, Oltin nishonni
Vatanning ko‘ksiga taqib qo‘ymoqlik!
Yetmish tomirimda oqsin deb huzur
So‘ngra yig‘lamoqlik sevinchdan qalqib…
Senga g‘alabalar keltirgan nodir,
G‘olib farzandlaring sharafla, Xalqim!
Foto: Daryo
