Orasta qizlar bilimi saralandi
Xalq ta’limi vazirligi tomonidan Uchtepa tumanidagi 38-umumta’lim maktabida “Orasta qizlar” ko‘rik-tanlovining yakuniy respublika bosqichi o‘tkazildi.
Mazkur ko‘rik-tanlov to‘rt bosqichda tashkil etilib, unda umumta’lim maktablarining 8-9-sinf o‘quvchi-qizlari ishtirok etdi. Tanlovning yakuniy respublika bosqichida Qoraqalpog‘iston Respublikasi, Toshkent shahri va viloyatlaridan tashrif buyurgan o‘quvchilar 5 ta shart bo‘yicha bellashib, o‘zlarining bor iqtidorlarini namoyon qildilar.
Yakuniy natijaga ko‘ra Farg‘ona viloyati O‘zbekiston tumanidagi 17-umumta’lim maktabining 9-sinf o‘quvchisi Parizoda Ro‘ziboyeva 1-o‘rinni, Navoiy viloyati Karmana tumanidagi 15-umumta’lim maktabning 9-sinf o‘quvchisi Dilnavoz Qurbonova va Surxondaryo viloyati Termiz shahridagi 12-“Mehribonlik” uyi tarbiyalanuvchisi Maftuna Abdumo‘minovalar 2-3-o‘rinlarni qo‘lga kiritdi.
Tanlov g‘olib va sovrindorlariga diplom va esdalik sovg‘alari topshirildi.
Xalq ta’limi vazirligi
matbuot xizmati
