Ораста қизлар билими сараланди

Халқ таълими вазирлиги томонидан Учтепа туманидаги 38-умумтаълим мактабида “Ораста қизлар” кўрик-танловининг якуний республика босқичи ўтказилди.

Мазкур кўрик-танлов тўрт босқичда ташкил этилиб, унда умумтаълим мактабларининг 8-9-синф ўқувчи-қизлари иштирок этди. Танловнинг якуний республика босқичида Қорақалпоғистон Республикаси, Тошкент шаҳри ва вилоятларидан ташриф буюрган ўқувчилар 5 та шарт бўйича беллашиб, ўзларининг бор иқтидорларини намоён қилдилар.

Якуний натижага кўра Фарғона вилояти Ўзбекистон туманидаги 17-умумтаълим мактабининг 9-синф ўқувчиси Паризода Рўзибоева 1-ўринни, Навоий вилояти Кармана туманидаги 15-умумтаълим мактабнинг 9-синф ўқувчиси Дилнавоз Қурбонова ва Сурхондарё вилояти Термиз шаҳридаги 12-“Меҳрибонлик” уйи тарбияланувчиси Мафтуна Абдумўминовалар 2-3-ўринларни қўлга киритди.

Танлов ғолиб ва совриндорларига диплом ва эсдалик совғалари топширилди.

Халқ таълими вазирлиги

матбуот хизмати