O‘zbekiston Yevropaga meva va sabzavotlar yetkazib beradi
Latviya poytaxti Riga shahrida joriy yilning 28-30 avgust kunlari Latviya-O‘zbekiston mamlakatlari o‘rtasida biznes forum o‘tkazildi.
Ushbu forum doirasida “O‘zbekoziqovqatxolding” XK vakillari tomonidan oziq-ovqat sohasida bir nechta yo‘nalishlar bo‘yicha muzokaralar olib borildi.
“O‘zbekoziqovqatxolding” matbuot xizmati “Kun.uz”ga xabar qilishicha, bu muzokaralar natijasiga ko‘ra, Riga shahrida O‘zbekiston -Latviya savdo uyi ochilishiga kelishib olindi. Shuningdek, Yevropaning barcha mamlakatlari, Skandinaviya va Boltiqbo‘yi davlatlariga O‘zbekistondan keltirilgan oziq-ovqat mahsulotlarni saqlab va yetkazib beruvchi logistika markazi “hub” ishga tushiriladi. Bundan ko‘zlangan asosiy maqsad Yevropa mamlakatlari savdo pesh-taxtalarini O‘zbekistonning sarxil mevalari va boshqa oziq-ovqat mahsulotlari bilan ta’minlashdir.
Muzokaralar davomida shuningdek, Jizzax viloyatida qattiq turdagi pishloq mahsulotlarini ishlab chiqaruvchi korxonani ochish bo‘yicha memorandum imzolangan.
