Ўзбекистон Европага мева ва сабзавотлар етказиб беради
Латвия пойтахти Рига шаҳрида жорий йилнинг 28-30 август кунлари Латвия-Ўзбекистон мамлакатлари ўртасида бизнес форум ўтказилди.
Ушбу форум доирасида “Ўзбекозиқовқатхолдинг” ХК вакиллари томонидан озиқ-овқат соҳасида бир нечта йўналишлар бўйича музокаралар олиб борилди.
“Ўзбекозиқовқатхолдинг” матбуот хизмати “Kun.uz”га хабар қилишича, бу музокаралар натижасига кўра, Рига шаҳрида Ўзбекистон -Латвия савдо уйи очилишига келишиб олинди. Шунингдек, Европанинг барча мамлакатлари, Скандинавия ва Болтиқбўйи давлатларига Ўзбекистондан келтирилган озиқ-овқат маҳсулотларни сақлаб ва етказиб берувчи логистика маркази “ҳуб” ишга туширилади. Бундан кўзланган асосий мақсад Европа мамлакатлари савдо пеш-тахталарини Ўзбекистоннинг сархил мевалари ва бошқа озиқ-овқат маҳсулотлари билан таъминлашдир.
Музокаралар давомида шунингдек, Жиззах вилоятида қаттиқ турдаги пишлоқ маҳсулотларини ишлаб чиқарувчи корхонани очиш бўйича меморандум имзоланган.
