Muzeylarda moziy nafasi
Madaniyat va sport ishlari vazirligi tomonidan Olimpiya shon-shuhrati muzeyida “Mustaqillik davri muzeylari: kecha va bugun” mavzusida matbuot anjumani o‘tkazildi.
Bugungi kunda respublikamiz bo‘yicha jami 444 ta muzey mavjud. Shundan davlat byudjetida moliyalashtirilgan muzeylar 135 ta (filiallari bilan)ni tashkil etadi. Shuningdek, 99 ta nodavlat muzey, 28 ta kollej muzeyi, 182 ta maktab muzeyi mavjud. Mazkur muzeylarda 2 mln. 387 mingdan ortiq eksponat saqlanadi.
– Mana ikki yildirki, 2-8 sentyabr kunlari respublikamiz muzeylarida “Muzeylar haftaligi” o‘tkazib kelinmoqda. Mamlakatimiz aholisi, ayniqsa, yoshlarni muzey faoliyati bilay yaqindan tanishtirish ulkan va boy madaniy merosimizga bo‘lgan hurmat va ehtiromning bir bo‘lagidir, – deydi Yunus Rajabiy uy muzeyining rahbari Hasan Rajabiy.
Anjuman doirasida ommaviy axborot vositalari vakillari mas’ul xodimlardan o‘zlarini qiziqtirgan savollarga javob oldilar.
Xurshida Husenova
