Yaxshiliklar shahri
Sirojiddin SAYYID, O‘zbekiston xalq shoiri
Asl farzand oqil bo‘lar,
Egri yo‘ldan ketmaydi…
To‘g‘ri yo‘ldan ketgan farzand
Biling, eldan ketmaydi.
Kim aytadi bu kuch-quvvat
Bir kun beldan ketmaydi?
Bir yaxshilik, bir yomonlik
Aslo dildan ketmaydi.
Bobolardan qolgan bog‘u
Bo‘stonlarning naqshidir.
Yaxshiliklar shahridir bu,
Yaxshiliklar shahridir.
Bozoriga kirsang ko‘zing
Qamashtirgay rastalar.
Rastalardan qiqirlaydi
Senga xandon pistalar.
Ayniqsa shod, baxtiyordir
Sumak sotgan ustalar.
Bir mo‘ysafid sumak olar
Bir emas, sakkiztalar.
Yoshmi qari, mardmi, juvon
Bir niyatning ahlidir.
Yaxshiliklar shahridir bu,
Yaxshiliklar shahridir.
Inson umri bu olamda
Bir imtihon, bir sinov.
Qo‘rg‘onlarining kechalari
Tushimga kirar, Denov.
Mayli, kimdir yer haydasin
Uy qurib o‘tsin birov.
Qolsin deyman har odamdan
Bir mash’ala, bir olov.
Orzularing bulog‘idir,
Ummonidir, nahridir.
Yaxshiliklar shahridir bu,
Yaxshiliklar shahridir.
Yerdan faqat don unsinu
Mehr yog‘sin osmonlar.
Derazalar alla aytsin,
Nur taratsin ayvonlar.
Bu maskanda iqbol topar
Yaxshi ahdu paymonlar.
Chunki, bunda yaxshilik bor,
Yashar yaxshi insonlar.
Ulug‘ yurtning bir timsoli,
Kamolidir, faxridir.
Yaxshiliklar shahridir bu,
Yaxshiliklar shahridir.
