UMR YO’LDOSHIM
Baxt izlab yashar inson,
Har kimda yo‘q bu imkon,
Tangrim bergan zo‘r in’om,
Baxt tongimda quyoshim,
Mening umr yo‘ldoshim.
Ishq bog‘imda yagonam,
Gullar ichra durdonam,
Sen-la nurli koshonam,
Yolg‘izginam, darddoshim,
Mening umr yo‘ldoshim.
Farzandlarim onasi,
Har damda parvonasi,
Qalbimning jononasi,
Oqshomlari sirdoshim,
Mening umr yo‘ldoshim.
Ishq chirog‘ing so‘nmasin,
Orzularing o‘lmasin,
Sabr kosang to‘lmasin,
Goh qaysar, goh yuvoshim,
Mening umr yo‘ldoshim.
Sheriksan g‘amlarimga,
Ham shodon damlarimga,
Ko‘nikib kamlarimga,
Sen-la omondir boshim,
Mening umr yo‘ldoshim.
Oydayin yuzlaringga,
Boldayin so‘zlaringga,
Shod boqay ko‘zlaringga,
Rafiqam – yostiqdoshim,
Mening umr yo‘ldoshim.
Shuhrat HAYITOV
