Шижоатли қизлар баҳси
Пойтахтимиздаги “Чилонзор” болалар спорт мажмуида 1999-2000 йилларда туғилган ўқувчи-қизлар ўртасида енгил атлетика бўйича 8 март – Халқаро хотин-қизлар кунига бағишланган “Баҳор маликалари” мусобақаси бўлиб ўтди.
Ўзбекистон Болалар спортини ривожлантириш жамғармаси Тошкент шаҳар филиали томонидан ташкил этилган мусобақада 100 нафарга яқин қиз турли масофаларга югуриш ва узунликка сакраш баҳсларида ўзаро куч синашди.
300 метрга югуриш бўйича чилонзорлик Камила Кракова биринчи, Анастасия Крянина учинчи ўринни эгаллади. Кумуш медаль Мирзо Улуғбек туманидан Мафтуна Саидовага насиб этди.
60 метрга югуриш бўйича олмазорлик Александра Ходосова, Алмира Соколова ва Мирзо Улуғбек туманидан Шарофат Назарова, узунликка сакраш баҳсида чилонзорлик Александра Фоизова, бектемирлик Мадина Шоимова ва Ҳамза туманидан Наталья Полонец ғолиб ва совриндорлар қаторидан жой олди.
Б.АЙТМУРОДОВ,
ЎзА мухбири
