Bolalardan bolalarga
Kuni kecha V.Uspenskiy nomidagi Respublika ixtisoslashtirilgan musiqa akademik litseyida ushbu ta’lim muassasasi o‘quvchilari tashabbusi bilan “Bolalardan bolalarga” deb atalgan an’anaviy xayriya konserti bo‘lib o‘tdi.
Har oyning 15-sanasida o‘tkaziladigan mazkur konsert dasturida respublika miqyosidagi ko‘rik-tanlovlarda g‘oliblikni qo‘lga kiritgan yosh iste’dod egalari ishtirok etdilar. Konsertdan tushgan mablag‘ Gematologiya qon quyish ilmiy-tekshirish institutida davolanayotgan bolalarga kerakli dori-darmonlar uchun sarflanadi.
Xalqimizning yuksak fazilatlaridan bo‘lgan birdamlik, saxovat va muruvvat yordamini ko‘rsatish kabi ezgu qadriyatlarni e’zozlash tashabbusi bilan chiqqan o‘quvchilar xasta tengdoshlari bilan do‘stlik rishtalarini o‘rnatib, murg‘ak qalblarga madad bo‘layotganlaridan baxtiyor.
Xayriya konsertida ilk bor yangragan “Bolalardan bolalarga” qo‘shig‘ining matni va musiqasini ham yosh san’at g‘unchalarining o‘zlari yaratgan.
Xayriya konsertida xalqaro tanlov g‘oliblari Muhriddin Sayfiddinov, Yulya Gabdyukova, “Yangi avlod — 2012” respublika tanlovi g‘oliblari Shohruh Abduvorisov va Shohruh Ne’matjonov, Nikita Stetsenkolarning chiqishi tomoshabinlarda katta qiziqish uyg‘otdi. Ayniqsa, “Yangi avlod — 2012” respublika tanlovi g‘oliblari namanganlik Otabek Sobirjonov va Jamshid G‘afforovlar ijrosidagi “Mustahzod” qo‘shig‘i yig‘ilganlarning olqishiga sazovor bo‘ldi.
Maryam QODIROVA
