Болалардан болаларга
Куни кеча В.Успенский номидаги Республика ихтисослаштирилган мусиқа академик лицейида ушбу таълим муассасаси ўқувчилари ташаббуси билан “Болалардан болаларга” деб аталган анъанавий хайрия концерти бўлиб ўтди.
Ҳар ойнинг 15-санасида ўтказиладиган мазкур концерт дастурида республика миқёсидаги кўрик-танловларда ғолибликни қўлга киритган ёш истеъдод эгалари иштирок этдилар. Концертдан тушган маблағ Гематология қон қуйиш илмий-текшириш институтида даволанаётган болаларга керакли дори-дармонлар учун сарфланади.
Халқимизнинг юксак фазилатларидан бўлган бирдамлик, саховат ва мурувват ёрдамини кўрсатиш каби эзгу қадриятларни эъзозлаш ташаббуси билан чиққан ўқувчилар хаста тенгдошлари билан дўстлик ришталарини ўрнатиб, мурғак қалбларга мадад бўлаётганларидан бахтиёр.
Хайрия концертида илк бор янграган “Болалардан болаларга” қўшиғининг матни ва мусиқасини ҳам ёш санъат ғунчаларининг ўзлари яратган.
Хайрия концертида халқаро танлов ғолиблари Муҳриддин Сайфиддинов, Юля Габдюкова, “Янги авлод — 2012” республика танлови ғолиблари Шоҳруҳ Абдуворисов ва Шоҳруҳ Неъматжонов, Никита Стеценколарнинг чиқиши томошабинларда катта қизиқиш уйғотди. Айниқса, “Янги авлод — 2012” республика танлови ғолиблари наманганлик Отабек Собиржонов ва Жамшид Ғаффоровлар ижросидаги “Мустаҳзод” қўшиғи йиғилганларнинг олқишига сазовор бўлди.
Марям ҚОДИРОВА
