ФОЗИЛ МУСАЕВ ЁЗДА “АТЛЕТИКО” ФУТБОЛЧИСИГА АЙЛАНИШИ УМКИН
Ўтган мавсумни Қаршининг “Насаф” клубида ўтказган Ўзбекистон терма жамоасига номзод Фозил Мусаев билан Мадриднинг “Атлетико” клуби қизиқиб қолган.
“Stadion.Uz”га яқин манбаларнинг хабар беришича, мадридликлар селекционерлари футболчини жамоанинг қишки йиғинига таклиф қилиб кўрикдан ўтказишни таклиф қилишган. Шартга кўра, агар Фозил Мусаев кўрикда Диего Симеонега маъқул келса, ёзги трансфер мавсумига бориб улар Фозилни сотиб олишларини билдиришган.
Янги мавсумдан бошлаб “Бунёдкор” таркибида шуғулланаётган Мусаев ва мураббийлар штаби агар футболчини “Атлетико” ёзда сотиб олишни режа қилаётган бўлса, селекционерларнинг ёзга қадар футболчининг ўйинларини кузатиш орқали уни кўрикдан ўтказиш мумкинлигини таъкидлашган.
Шундай қилиб “Бунёдкор”да мавсумни бошлаши кутилаётган Мусаевни ёзга қадар “Атлетико” вакиллари кузатиб боришади. Вазият бир маромда давом этса, Мусаев ёзнинг дастлабки ойида кўрикдан ўтиш учун “Атлетико”га жўнаб кетади. Агар кўрик муваффақиятли ўтса, Мусаев Испания чемпионатида тўп сурувчи жамоа сафига ўтган илк ўзбекистонлик футболчи бўлиши мумкин.
Манба: Stadion.uz
