ЕНГИЛ АТЛЕТИКАЧИЛАРИМИЗ ҒАЛАБАСИ
Қирғизистон пойтахти Бишкек шаҳрида енгил атлетика бўйича ўтказилган анъанавий халқаро турнирда ўзбекистонлик спортчилар 8 та олтин, 9 та кумуш ва 7 та бронза медални қўлга киритди.
Турли масофаларга югуришда Ортиқ Рамазонов биттадан олтин ва кумуш, Хуршид Аҳмадалиев олтин, Николай Розанов ва Зикрилло Маматқулов кумуш, Руслан Носиров биттадан кумуш ва бронза, Севара Кучмурадова иккита бронза, Нурхон Муҳитдинова ва Наталья Асанова биттадан бронза медалга сазовор бўлди.
Найза улоқтиришда аёллар ўртасидаги баҳсларда Анастасия Свечникова биринчи ўринни эгаллаган бўлса, Нозима Мухторова учинчи ўринни қўлга киритди. Эркак спортчилар ўртасида ҳамюртимиз Нуриддин Рўзматов иккинчи ўринга сазовор бўлди. Узунликка сакраш баҳсларида Андрей Резниченко шоҳсупанинг энг юқори поғонасига кўтарилди. Никита Логинов иккинчи ўринни эгаллади.
Уч ҳатлаб сакраш баҳсларида Виктория Дирдинага тенг келадиган спортчи топилмади. Оксана Молчанова ва Иван Денисов кумуш, Василис Монолис бронза медаль билан тақдирланди. Сергей Дементьев ядро улоқтириш мусобақаларида тенгсиз эканини исботлади. Артём Давлетов иккинчи бўлди. Шунингдек, терма жамоамиз аъзолари эстафета баҳсларида маррага биринчи етиб келди.
Т. ОРТИҚОВА
