Bilimdon bolajonlar tadbiri
Poytaxtimizning Yashnobod tumanidagi 214-umumta’lim maktabida o‘quvchilarning dunyoqarashini kengaytirish, undagi ijodiy ko‘nikmalarni yanada rivojlantirish, Vatan, ota-ona va kattalar oldidagi burch va mas’uliyatni teranroq anglashiga ko‘maklashish maqsadida 1-“A”sinf o‘quvchilari tomonidan “Buyuk yurt farzandlari” mavzusida adabiy badiiy kecha tashkil etildi.
Tadbirda bolajonlar o‘zlarining badiiy chiqishlari bilan ishtirok etdi. Ijro etilgan kuy-qo‘shiqlar va she’rlari yig‘ilganlarda katta taassurot uyg‘otdi.
– Maktabimizda o‘tkaziladigan bunday kechalar bolalarning dunyoqarashini oshirishda muhim hisoblanadi. Shuningdek, ularning bayramlarga tayyorgarlik ko‘rish jarayonida bir-biri bilan muloqoti yanada mustahkamlanadi, – deydi boshlang‘ich sinf o‘qituvchisi Umida Haydarova.
Bayram kechasida Muqimiy nomidagi musiqali drama teatri ijodkorlari tomonidan ijro etilgan “Chol, kampir va bilmasvoylar” spektakli namoyish etildi.
M. TOLIPOVA,
“Sog‘lom avlod” muxbiri
