ТЕЗ, ҚУЛАЙ ВА ЗАРАРЛИ!
Замонавий, тез тайёр бўладиган ва ниҳоятда оммалашган фаст-фуд тўғрисида шу вақтгача кўп эшитганмиз. Ҳозирча тез тайёрланадиган таомлар устида асосан ортиқча вазн пайдо қилиши юзасидан тадқиқотлар олиб борилган.
Аммо, америкалик олимларнинг изланишлари натижасида маълум бўлишича фаст-фуд нафақат инсоннинг жисмоний ҳолатига, балки, болаларнинг мия фаолиятига салбий таъсир кўрсатиши мумкин экан.
АҚШнинг Огайо ва Техасс тадқиқот институтлари олимлари гуруҳи томонидан фаст-фуд истеъмол қилган болаларнинг мактаб дарсларини ўзлаштиришда қолганлардан ортда қолишлари юзасидан текширувлар ўтказишди.
3 йил давомида олиб борилган “Early Childhood Longitudinal Study” деб номланган кенг қамровли тадқиқотда 11 минг нафарга яқин мактаб ўқувчилари иштирок этишди. Дастлаб 5 синф ўқувчиларининг ўзлаштириш варақаси ҳамда кундалик овқатланиш тартиблари олинди. Орадан 3 йил ўтгач 8-синфда таҳсил олаётган болаларнинг ўзлаштиришлари аввалгиси билан солиштирилди. Унга кўра тез тайёрланувчи таомларни мунтазам истеъмол қилган болалар мактаб дарсларини ўзлаштиришда сезиларли даражада ортда қолиб кетишгани маълум бўлди.
Г.ЭГАМБЕРДИЕВА
