Chevar va chaqqon qizlar
Ayni kunlarda diyorimizning barcha hududlarida eng azaz va eng muqaddas bayram arafasida “Yagonasan, muqaddas Vatanim, sevgi va sadoqatim senga baxshida, go‘zal O‘zbekistonim” degan g‘oyani o‘zida mujassam etgan bayram tadbirlari bo‘lib o‘tmoqda.
Olmazor tuman hokimligi, tuman Xotin-qizlar qo‘mitasi, Madaniyat va sport bo‘limi, “Sog‘lom avlod uchun” xalqaro xayriya fondi tayanch maskani hamkorligida poytaxtimizdagi 1-”Muruvvat” uyida bo‘lib o‘tgan tadbir ham aynan ana shu qutlug‘ shodiyonaga bag‘ishlandi. Bolajonlar o‘rtasida o‘tkazilgan “Quvnoq startlar” sport musobaqalari, rasmlar tanlovi ularning o‘z iqtidorini namoyish etishga keng yo‘l ochdi.
Shuningdek, “Balli, qizlar” ko‘rik-tanlovida ishtirok etgan qizlarning chaqqonligi, topqirligi, yuksak didi hakamlar tomonidan baholandi.
Tadbirdan ko‘zlangan maqsad imkoniyati cheklangan tarbiyalanuvchilarning bo‘sh vaqtlarini mazmunli o‘tkazish, ularning dunyoqarashini kengaytirish, sog‘lomlashtirish hamda ommaviy sport musobaqalariga jalb qilishdan iborat. Bolajonlarning Vatanga bo‘lgan mehru muhabbatini, hayotga bo‘lgan ishonchini oshirish hamda ular ham jamiyatning bir bo‘lagi ekanligini, atrofdagilarning ularga nisbatan befarq emasliklarini ko‘rsatishdan iborat. Musobaqalar so‘nggida g‘oliblar tuman Xotin-qizlar qo‘mitasi va “Sog‘lom avlod uchun” xalqaro xayriya fondi tayanch maskani ta’monidan diplom va esdalik sovg‘alari bilan taqdirlandi.
Jamila HAYDAROVA
