EZGULIK elchilariga ehtirom
Yaqinda O‘zbekiston Xotin-qizlar qo‘mitasi tomonidan “Ezgulik elchilariga ehtirom” deb nomlangan tadbir o‘tkazildi.
Tadbirni o‘tkazishdan ko‘zlangan asosiy maqsad – ayollarga oid davlat siyosatini jamoatchilikka yetkazish, qo‘mita tizimida olib borilayotgan ishlarni matbuotda yanada keng yoritish bo‘lib, ommaviy axborot vositalari bilan o‘rnatilgan ijtimoiy hamkorlikni yanada mustahkamlash, turli veb-sahifalar hamda boshqa tashkilotlarning axborot xizmatlari bilan do‘stona munosabatlarni yo‘lga qo‘yish, shuningdek, hududiy Xotin-qizlar qo‘mitalari muassisligi hamda hamkorligida chop etilayotgan nashrlarni yanada faolroq bo‘lib, tizimda amalga oshirilayotgan ishlarni tahliliy-tanqidiy ruhda kengroq yoritishga bo‘lgan e’tiborni kkuchaytirishdan iborat.
Mazkur tadbirda o‘zbek ayolining bugungi qiyofasini ochib bera olgan, tizim yangiliklarini tezkor yoritgan, O‘zbekiston Xotin-qizlar qo‘mitasi faoliyatini keng jamoatchilikka yetkazishda yaqindan yordam bergan televideniye va radiojurnalistlari, Axborot agentliklari, gazeta va jurnallar hamda veb-sahifalar vakillariga O‘zbekiston Xotin-qizlar qo‘mitasining maxsus tashakkurnomasi hamda esdalik sovg‘alari topshirildi.
Tadbirda O‘zbekiston Respublikasi Bosh vazirining o‘rinbosari, Xotin-qizlar qo‘mitasi raisi Elmira Bositxonova ishtirok etdi va barchani yaqinlashib kelayotgan O‘zbekiston Respublikasi mustaqilligining yigirma uch yilligi bilan muborakbod etdi.
Muhabbat XO‘JAMURODOVA
