Navoiyda kitoblar ko‘rgazmasi
Navoiy shahrida “Adabiyotga e’tibor – kelajakka e’tibor” shiori ostida kitoblar ko‘rgazmasi tashkil etildi.
“O‘zbekkitobsavdo” aksiyadorlik kompaniyasi, Respublika Ma’naviyat targ‘ibot markazi viloyat bo‘limi va viloyat axborot-kutubxona markazi hamkorligida tashkil etilgan ko‘rgazmada 500 nomdan ortiq kitoblar namoyish etilmoqda.
– Ko‘rgazma Prezidentimiz rahnamoligida milliy ma’naviyatimizni yanada boyitish, boy madaniy merosimizni asrab-avaylash va rivojlantirishga qaratilayotgan alohida e’tiborning amaldagi ifodasi bo‘ldi, – deydi viloyat axborot-kutubxona markazi direktori Ramazon Rajabov. – 20 aprelga qadar davom etadigan ko‘rgazma doirasida kitoblar savdosi ham o‘tkazilayotir. Joylardagi axborot-resurs markazlari kitob fondini boyitishda bunday ko‘rgazmalarning ahamiyati katta.
– Ko‘rgazmaga ikki farzandim bilan birga keldik, – deydi Zamira Rahimova. – Ular o‘zlari qiziqqan ilmiy va badiiy adabiyotlardan xarid qilishdi. Bunday ko‘rgazmalar, ayniqsa, yoshlarda kitobxonlik madaniyatini yuksaltirishga xizmat qiladi.
N.RAHIMOV,
O‘zA muxbiri
