Kulgu shifoxonasi (2014/10)
Peshtoqida “Ko‘ngil siringizni gul orqali izhor eting!” deb yozib qo‘yilgan gul do‘koniga bir yigit kiribdi.
– Menga bir dona atirgul bering, – debdi sotuvchiga.
– Atiga bittami?
– Ha. Men juda kamgapman!
* * *
Er xotiniga dedi;
– Esingdami, o‘tgan yili tilla soatingni yo‘qotganding. Bugun shkafni ochib eski kurtkangning cho‘ntagini qarasam…
– Voy soatimni topdingizmi?!
– Yo‘q, taxminimcha, soating tushib ketgan teshikni topdim.
* * *
Xotin eriga sihatgohdan telefon qilmoqda.
– Bu yerda bir oy dam olib yarim vaznimni yo‘qotdim. 100 kilodan 50 kiloga tushdim. Yana qolsam maylimi?
– Yana bir oy qolaqol…
* * *
– Ko‘zingizga qarab yursangiz bo‘lmaydimi, – dedi mashinasida piyodani urib yuborayozgan tannoz ayol. – Men juda ehtiyotkor haydovchiman. 10 yildan buyon mashina haydayman.
– U holda menga sizning hech qanaqa e’tirozingiz bo‘lishi mumkin emas. Men qirq besh yildan buyon piyoda yuraman.
