Mitti yurak haqida nimalarni bilamiz?
Ona vujudidagi mitti yurakning ovoz berishi juda yoqimli holat. Ayniqsa, uning harakatlanishi o‘zgacha kayfiyat bag‘ishlaydi. Xo‘sh, to‘polonchi hali tug‘ilmasidan yana qanday shumliklar qiladi?
– homila 11 haftalik bo‘lgach, bachadon devori bo‘ylab «yurish»ni boshlaydi;
– 9 haftalik bo‘lgan homila onasi bilan muloqotga kirishishni istab, yengil harakatlanadi. Ammo juda kichik bo‘lgani uchun biz buni sezmaymiz;
– homila 30 haftalik bo‘lganida esnaydi, 32 haftaligida esa qo‘llarini harakatga keltirib, o‘ynaydi. Ba’zan aynan mana shu muddatda o‘tkazilgan UTT tekshiruvida esnayotgan bolakayni ko‘rish mumkin;
– embrionning o‘g‘il yoki qiz farzand bo‘lishi 12 haftadan so‘ng ma’lum bo‘ladi. Unga qadar o‘tkazilgan UTT tekshiruvida esa bola jinsini aniqlab bo‘lmaydi;
– 24 haftadan o‘tgan homila muddatidan erta tug‘ilganida ham yashab ketishi mumkin;
– buni qarangki, chaqaloqlarning atigi 5 foizigina shifokorlar aniqlagan muddatda dunyoga kelishadi;
– 6 haftadan 11 haftagacha homila rivojlanishi jadal bo‘lib, buyrak va oshqozon a’zolari shakllanadi. Shunisi qiziqki, bu a’zolar atigi guruch donasidek kattalikda bo‘ladi;
– tug‘ilajak farzandingizning yurak urishini 22 haftadan so‘ng eshita olasiz. Buning uchun shifokorlar maxsus eshitish moslamasidan foydalanishadi;
– buni qarangki, 16 haftalik homila barmoqlarini musht qilib, harakatlantirishi mumkin ekan;
– homilaning ichki a’zolari 6 oygacha shakllansa, undagi his-tuyg‘ular shu haftadan so‘ng yuzaga keladi;
– asabiy bo‘lsangiz, homiladorlikning yettinchi oyiga kelib, bu odatingizni bas qiling. Chunki yetti oylikdan so‘ng vujudingizdagi mitti «odamcha» tashqi omillarga ta’sirchan bo‘ladi;
– tug‘ilajak farzandingiz bilan ko‘proq suhbatlashing. Homila onasining ovozini yaxshi eshitadi;
– agar to‘qqiz oyni 100 foiz deb tasavvur qilsak, shundan 10 foiz vaqtda homila uyg‘oq bo‘ladi. Qolgan vaqtlarda esa uxlaydi.
Laziza ALLAYOROVA
