SPORT (2013-38)
ТЕННИС. Республика Олимпия захиралари теннис мактаби кортларида хотин-қизлар ўртасида ўтказилган анъанавий «Тошкент опен – 2013» халқаро турнирининг яккалик баҳсларида сербиялик Бояна Йовановский бош совринни қўлга киритди. У финалда беларуслик Ольга Говорцовани 4:6, 7:5, 7:6 ҳисобида мағлубиятга учратди. Жуфтликлар ўртасидаги ҳал қилувчи баҳсда қозоғистонлик Ярослава Шведова ва венгриялик Тимея Бабош жуфтлиги Ольга Говорцова (Беларусь) ва Мэнди Минелла (Люксембург) дуэтини 6:3, 6:3 ҳисобида енгди.
ТРАМПЛИН. Испаниянинг Вальядолид шаҳрида трамплиннинг батутда сакраш йўналиши бўйича жаҳон кубогининг иккинчи босқичи якунланди. Унда терма жамоамиз вакиллари – Пекин Олимпиадаси совриндори Екатерина Хилько ва Анна Каспарян синхрон сакрашда кумуш медални қўлга киритди.
БОКС. Киев шаҳрида ўтказилган ўсмирлар ўртасидаги жаҳон чемпионатида Ўзбекистон терма жамоаси аъзоси Элдор Мержанов бронза медалга сазовор бўлди. Иқтидорли боксчимиз ярим финалгача бўлган баҳсларда италиялик Самуэль Манцарелани, литвалик Витаутас Балсисни ва грузиялик Георги Кхарабадзени мағлубиятга учратди.
