Tadbirkorlik asoslari
Endi ushbu fan maktab o‘quvchilariga dars sifatida o‘tiladi
Milliy matbuot markazida O‘zbekiston Respublikasi Prezidentining umumiy o‘rta, o‘rta maxsus va kasb-hunar ta’limi tizimini tubdan takomillashtirish chora-tadbirlari to‘g‘risidagi farmoni mazmun-mohiyatiga bag‘ishlangan matbuot anjumani o‘tkazildi.
O‘zbekiston Respublikasi Xalq ta’limi vaziri U. Inoyatov va boshqalar ota-onalar, keng jamoatchilikning fikr va takliflari inobatga olingan holda 2017/2018 o‘quv yilidan boshlab umumta’lim maktablarining 9-sinf bitiruvchilariga o‘z xohishiga mos tarzda maktablarning 10-sinfida yoki akademik litsey va kollejlarda o‘qishni davom ettirish imkoniyati yaratilganini ta’kidladi.
Davlatimiz rahbarining 2018 yil 25 yanvardagi tegishli qaroriga muvofiq 2018/2019 o‘quv yilidan boshlab majburiy umumiy o‘rta va o‘rta maxsus ta’lim umumta’lim maktablarida, jumladan, ixtisoslashtirilgan san’at va madaniyat, olimpiya zaxiralari maktab-internatlarida hamda akademik litseylarda uzluksiz va 11 yillik muddatda amalga oshiriladi.
11 yillik ta’limning joriy etilishi munosabati bilan Xalq ta’lim vazirligi tomonidan olimlar, amaliyotchi o‘qituvchilar, ota-onalar fikriga tayangan holda 10-11-sinflar uchun 12 ta umumta’lim fanlari bo‘yicha o‘quv rejalari qaytadan ishlab chiqilib, ularga qator o‘zgartirishlar kiritildi. Fan dasturlari asosida 10-sinf o‘quvchilariga umumta’lim fanlaridan 18 nomdagi darsliklar 7 tilda jami 9 milliondan ortiq adadda chop etildi va joylarga yetkazildi.
Umumiy o‘rta ta’lim maskanlari 10-11-sinf o‘quvchilarining ta’lim olishi bilan birga ularga kasb o‘rgatish maqsadida joylarda o‘quv-ishlab chiqarish majmualarining faoliyati keng yo‘lga qo‘yildi. Mazkur majmualarda 50 dan ortiq kasbni o‘rgatishga alohida e’tibor qaratilmoqda. 11-sinfdan boshlab esa kasb ta’limi orqali hunar sirlarini o‘rgatish bilan birga “Tadbirkorlik asoslari” fani ham o‘qitiladi. Majmualarda kasblar murakkabligiga qarab 1 yoki 2 yil davomida o‘rgatiladi va mehnat bozoridagi ehtiyojga asosan o‘zgarib turadi.
2017/2018 o‘quv yilining ikkinchi yarim yilligidan boshlab yurtimizning har bir hududidan tanlangan 28 ta o‘quv ishlab chiqarish majmuasida 9-sinf o‘quvchilariga kasb o‘rgatish ishlari tajriba-sinov tarzida olib borilmoqda. Uning natijalari asosida kelgusida kasb o‘rgatish sirlarini maktablarning 9-sinflaridan boshlash ko‘zda tutilgan. Shuningdek, 2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini Faol tadbirkorlik, innovatsion g‘oyalar va texnologiyalarni qo‘llab-quvvatlash yilida amalga oshirishga oid Davlat dasturi vazifalaridan kelib chiqqan holda ilg‘or xorijiy tajribalar va o‘qitishning innovatsion metodlari, zamonaviy axborot-kommunikatsiya texnologiyalarini keng joriy etgan holda 11-sinflar uchun 20 nomdagi 9,7 million tirajdagi darsliklar yaratiladi.
Matbuot anjumanida ommaviy axborot vositalari xodimlarining savollariga javob qaytarildi.
