Ashxobod-2017: 13 ta medal bilan 2-o‘rindamiz
Turkmaniston poytaxti Ashxobod shahrida yopiq inshootlardagi Osiyo o‘yinlari bo‘lib o‘tmoqda.
Kecha musobaqaning ilk kunida eng katta delegatsiya bilan ishtirok etayotgan o‘zbekistonlik sportchilar jami 13 ta medalni qo‘lga kiritishdi. Shulardan 2 tasi oltin medallardir.
Terma jamoamizga oltin medallarni kurashchilarimiz Obidali Mavlonov hamda Ilhomjon Mashrapovlar taqdim etishdi. Birinchi kun yakunlariga ko‘ra, O‘zbekiston terma jamoasi 2 ta oltin, 3 ta kumush va 8 ta bronza medali bilan umumjamoa hisobida ikkinchi o‘rinni egallab turibdi.
Musobaqaning tennis bahslari doirasidagi turnirda hamyurtimiz ishtirokidagi bahs yakuniga yetdi. Xotin-qiz tennischilar o‘rtasidagi yakkalik bahslarida iste’dodli tennischimiz Arina Fols kortga chiqdi. Hamyurtimizning raqibasi indoneziyalik Aldila Sudjiyadi bo‘ldi. Ikki set davom etgan bahsda Fols 3:6, 2:6 hisobida imkoniyatni boy berdi va o‘z ishtirokini muddatidan ancha avval yakunladi.
Musobaqa mezboni Turkmaniston terma jamoasi ilk kungi bahslarda 16 ta, 14 ta kumush, 7 ta bronza medalini qo‘lga kiritishdi. Kuchli uchlikka Tailand terma jamoasi yakun yasagan. Tailandliklarda ham ikki nafar chempion bor.
N.NORBOBOYEV
