Hayot kuzatuvlaridan qaydlar
Ota-bobolaru ona-momolarning keksayib kuchdan qolishi insonga tushkunlik bag‘ishlasa, farzandu nabiralarning ulg‘ayishi kuch-quvvat baxsh etadi.
* * *
Yoshlik, talabalar shaharchasi va talabalar uyidagi ilm o‘rganish, hayotda o‘z o‘rnini topishga bo‘lgan intilishlar umrimizning betakror damlaridir.
* * *
Yomon odamning hamma bolasi ham nodonu yomon bo‘lavermaydi.
* * *
Turli muammolar uchun ortiqcha va uzluksiz iztirob chekish aqllilik alomati emas.
* * *
Yomonlar bir umr yaxshilarning hurmati va obro‘yiga hasad qilib yashaydilar.
* * *
Olimu fozillar o‘z e’tiroz va tanbehlarini ham mayinlik, xushmuomalalik bilan bildiradilar.
* * *
O‘zining xatosi bilan yo‘lini yo‘qotganlarning aksariyati boshqalardan nolib yuradi.
* * *
Yaxshi odamlar quyoshga o‘xshaydi, quyosh barchaga baravar nur sochgani kabi yaxshilikdan ham barcha teng bahramand bo‘ladi.
* * *
Insonlar orasida yomon odamlarning bo‘lishi bog‘u gulzorda mayda yovvoyi o‘tlarning borligiga o‘xshaydi.
* * *
Har joyda har kimga maslahat berishga intiluvchilarning o‘zi tarbiyaga muhtojdir.
Abdishukur OMONOV
