Ishonch va e’tirof OAV xodimlariga yanada mas’uliyat yuklaydi
O‘zbek Milliy akademik drama teatrida 27 iyun – Matbuot va ommaviy axborot vositalari xodimlari kuniga bag‘ishlangan bayram tadbiri bo‘lib o‘tdi.
Tadbirda O‘zbekiston Respublikasi Prezidenti Shavkat Mirziyoevning matbuot va ommaviy axborot vositalari xodimlariga bayram tabrigini Prezidentning Davlat maslahatchisi X. Sultonov o‘qib eshittirdi.
Tadbirda O‘zbekiston Jurnalistlari ijodiy uyushmasi va boshqa tashkilotlar bilan hamkorlikda tashkil etilgan “Yilning eng faol jurnalisti” ijodiy tanlovi g‘oliblariga diplom va sovg‘alar topshirildi. Shuningdek, O‘zbekiston Respublikasi Jismoniy tarbiya va sport davlat qo‘mitasi tomonidan ta’sis etilgan “Eng faol sport jurnalisti” respublika tanlovi g‘olib va sovrindorlari ham taqdirlandi.
Yig‘ilishda so‘zga chiqqanlar matbuotimiz rivoji yo‘lida ko‘rsatilayotgan e’tibor, matbuot va ommaviy axborot vositalari xodimlarining mehnatini rag‘batlantirish borasidagi g‘amxo‘rligi uchun Prezidentimizga minnatdorlik bildirdi.
Tadbirda O‘zbek Milliy akademik drama teatrining “Mirzo Ulug‘bek” spektakli namoyish etildi.
