Sheriklik oshi
(Hangoma o‘rnida)
Boshni boshga qo‘yib
ikki hamsoya
tadbir tuzdi,
yo‘lin topdi nihoyat.
Moddiy ta’minotni
oshirmoq uchun
o‘rtaga tashladi
hamkorlik kuchin.
Kelishuv naqd bo‘ldi,
xayru xushomad.
Ikkiga bo‘linar
mo‘may daromad.
Reja maromiga kelib
xatlandi.
Azon ikki qo‘shni
bozor otlandi.
Yo‘lni yaqin qildi,
shirin xayol, o‘y.
Biri qo‘chqor sotdi,
biri sotdi qo‘y.
So‘ng bozor aylanib
ikkala shovvoz,
pulni jamlab oldi
ozg‘in bir novvos.
Niyat ezgu bo‘lsa,
qilsang harakat,
Chorvaning ishida
bordir baraka.
Ikki xonadonning
ul-bul chiqini,
Moyga to‘ldiradi
bir mol biqinin.
Ana qarabsizki,
hafta, oy o‘tib,
teriga sig‘maydi
buqaning eti.
Novvosga bir zumda
yotoq bo‘ldi shay.
Katta yong‘oq osti
hammaga qulay.
Nazardan panada
hovli etagi.
Birov ko‘z tashlamas
jo‘rttaga.
Xullas, kunlar asta
o‘ta boshladi.
Ikki qo‘shni intiq
kuta boshladi.
Axir hayot boshqa,
boshqadir xayol.
Bir molni boqish ham
keladi malol.
Qancha vajga sabab
bo‘ldi jonivor.
Necha bor suvsiz, och
qoldi jonivor.
Bir kun bechoraning
paymoni to‘ldi.
Ho‘kiz sansolarlik
qurboni bo‘ldi.
Xayriyat, halollab
oldi etini.
Qo‘shnilar janjalga
qoldi betinim.
To‘rt tuyoq ikkitadan
tushdiyu rosa,
Bir kalla, bir dumdan
qochdi murosa.
Oxir arraladi
tumshug‘idan so‘ng,
Ikkiga bo‘lindi
hatto arqon, go‘ng.
Ochildi ming yillik
“qaydlar kitobi”.
Eski jarohatlar,
dardlar kitobi.
Aytilmay qolmadi
bitta gina ham.
Beiz bo‘lib ketgan
ipu igna ham.
Quyosh botar bitdi
dahanaki jang.
Hamma uy-uyiga ketdi
holi tang.
So‘ng ikki hovlida
qarsillab o‘tin,
olov lovulladi,
burqsidi tutun.
Ikki doshqozonda
bir ho‘kiz boshi:
Ammo tatimadi
sheriklik oshi.
Faxriddin HAYIT
