Алишер Навоий асарлари таржима қилинди
Ўзбекисон Ёзувчилар уюшмасида Алишер Навоийнинг “Хазойин ул-маоний” асарининг рус тилига, Ойбекнинг “Навоий” романининг инглиз тилига таржима қилиниб, нашрдан чиқарилган китоблари тақдимоти бўлиб ўтди.
Ўзбекистон Ёзувчилар уюшмаси раиси ўринбосари Иқбол Мирзо, Ўзбекистон халқ шоирлари Омон Матжон, Усмон Азим ва бошқалар буюк бобокалонимизнинг бой маънавий меросини, ибратли ҳаёт йўли ва фаолиятини чуқур ўрганиш, уни ёшлар ўртасида кенг тарғиб этишга алоҳида эътибор қаратилаётганини таъкидлади.
Мамлакатимизда Навоий ижоди, бой меросига эътибор тобора юксалиб бораётир. Улуғ шоирнинг ижод намуналарини жаҳон халқлари тилларига таржима қилишга қизиқиш кучайиб бораётгани, айниқса, аҳамиятлидир.
Ўзбекистон Ёзувчилар уюшмаси ва “Ижод” жамоат фонди томонидан буюк мутафаккирнинг “Хазойин ул-маоний” асарини жаҳоннинг ўн тўрт тилида нашр этиш лойиҳаси ишлаб чиқилган. Ушбу лойиҳа доирасида “Хазойин ул-маоний” илк бор рус тилида “Сокровищница мысли” деб номланган тўплам ҳолида нашр этилди. Ушбу тўплам филология фанлари номзоди К.Панченко томонидан тузилди.
Атоқли адиб Мусо Тошмуҳаммад ўғли Ойбекнинг “Навоий” романида Алишер Навоий ҳаёти ва ижод йўли, ўша даврдаги ижтимоий ҳаёт ва мураккаб сиёсий воқеалар ўзига хос усулда акс эттирилган. Мазкур асар китобхонлар орасида катта қизиқиш ва алоҳида эътиборга сазовор бўлган. Уюшма томонидан ушбу асарни бошқа хорижий тилларга таржима қилишга алоҳида эътибор қаратилмоқда.
“Навоий” романи И.Тўхтасинов ва О.Мўминов томонидан инглиз тилига таржима қилинган.
– Алишер Навоий ижодига жаҳон миқёсида қизиқиш тобора кучайиб бораётир, – дейди шоир Рустам Мусурмон. – Бугунги кунда шоир ғазаллари инглиз, француз, немис ва бошқа тилларга таржима қилинмоқда. Зеро, Навоий асарларидаги теран фалсафа, бетакрор ташбеҳлар ва шеърий санъатнинг ранг-баранглиги бутун инсониятни эзгуликка, гўзалликка чорлайди. Бу улкан маънавий бойликни жаҳон бўйлаб кенг ёйиш, дунё халқларини Навоийнинг ижод намуналари билан баҳраманд этишда таржима санъатининг ўрни катта.
Тадбирда Алишер Навоий асарларининг ёш авлод тарбияси, маънавиятини юксалтиришдаги ўрни ва аҳамияти ҳақида атрофлича сўз юритилди. Навоий ғазаллари, рубоийлари ва шоир ижодига бағишлаб ёзилган мухаммаслар ўқилди.
Г.САТТОРОВА,
ЎзА мухбири
