KITOB BAYRAMI
Toshkent shahridagi 270-umumta’lim maktabida 2-aprel – Xalqaro bolalar kitobi kuniga bag‘ishlab “Farzandimga kitob sovg‘a qilaman” aksiyasi tashkil etildi.
Ota-onalar, mahalla faollari, taniqli ijodkorlar ishtirokida o‘tkazilgan tadbir o‘quvchilarda katta taassurot qoldirdi.
– Kitob – axborotlarni, g‘oya, obraz va bilimlarni saqlash hamda tarqatish, ijtimoiy-siyosiy, ilmiy, estetik qarashlarni shakllantirish vositasi, tarbiyaning ishonchli quroli, – deydi maktab direktorining ma’naviy-ma’rifiy ishlar bo‘yicha direktor o‘rinbosari S. Xoliqova. – Bugungi tadbirda ham o‘quvchilar nechog‘li kitobxon ekanini namoyish qildi.
O‘quvchilar qalbida kitobga mehr va hurmat uyg‘otish, ularning dunyoqarashi va estetik didini oshirish maqsadida tashkil etilgan ushbu aksiyada “Kitob olami” savdo majmuasi yaqinda nashrdan chiqqan badiiy asarlar savdosini ham tashkil qildi.
Gulasal SAIDOVA
