САРИМСОҚДАН ЯШАРТИРУВЧИ МАЛҲАМ
Қадим-қадимдан халқимиз саримсоқдан дори ва хуштаъм таомлар тайёрлашда кенг фойдаланган. Шарқ алломаси Абу Али ибн Сино ўз китобларида унинг табиий антибиотик эканлигини таъкидлаб, жуда кўплаб хусусиятларини очиб берган.
Бугунги кунда ҳам мамлакатимизда она тупроғимизнинг ушбу неъматидан фармацевтика соҳасида самарали қўлланилмоқда. Қуйидаги мақолада биз саримсоқдан Тибет тиббиётида қандай яшартирувчи малҳам тайёрланиши хусусида тўхталиб ўтамиз.
Сопол тахтачага ёзилган қуйидаги рецепт 1971 йили ЮНЕСКО экспедицияси томонидан Тибет ибодатхонасида топилган бўлиб, у эрамиздан 4-5 минг йил аввал битилган. Ушбу тавсия амалда синаб кўрилган ва дунёдаги кўплаб тилларга таржима қилинган. Рецептни қўллаш организмни ёғ ва зарарли хилтлардан тозалайди. Натижада моддалар алмашинуви ва томирлар қайишқоқлиги (эластиклиги) ортиб, миокард инфаркти, стенокардия, склероз, фалаж, турли шишлар пайдо бўлишининг олди олинади. Бошдаги шовқин йўқолади, кўз нури ўткирлашади. Аниқ ва тўғри дозаларда қўлланилганда организм яшаради.
Тайёрлаш усули: 350 грамм саримсоқ яхшилаб ювилиб, пўстидан тозаланади, ёғоч ёки чинни идишда туйилади. Ундан 200 грамм олиниб, шиша идишга солинади ва 200 грамм 95 фоизли спирт қуйилади. Идиш маҳкам ёпилиб, 10 кун қоронғу жойда асралади. Кейин суюқлик қалин матода сузилади. 3-4 кундан сўнг даволанишни бошлаш мумкин. Аниқ тартиб бўйича овқатдан 15-20 дақиқа олдин совуқ сут билан ичилади. Даволаш курси олти ойдан сўнг такрорланади.
Фазилат САЪДУЛЛАЕВА,
1-Республика тиббиёт коллежи катта ўқитувчиси
