LAVASHLI LAZANYa
Bilasizmi, aziz mushtariylar, bugun sizlarga tavsiya qilmoqchi bo‘lgan navbatdagi taomimiz o‘zining tez pisharligi va o‘zgacha ta’mi bilan xush yoqadi deb o‘ylaymiz.
Kerakli masalliqlar: lavash xamiri 3 dona, kolbasa 300 gramm, shampinon qo‘ziqorinlari 300 gramm, piyoz 2 dona, pomidor 3 ta, pishloq 50 gramm.
Tayyorlanishi: Piyozni qo‘ziqorin bilan mayda qilib to‘g‘rab, qovurib olamiz. Pomidorni halqa qilib to‘g‘raymiz, kolbasani yarim halqa shaklida to‘g‘rab, pishloqni qirg‘ichdan o‘tkazamiz.
Tayyor bo‘lgan masalliqlarni quyidagi ketma-ketlikda terib chiqamiz: lavash xamirini to‘rtburchak qilib kesib olamiz va kolbasa, qo‘ziqorin, pomidorni terib ustidan yana lavash xamirini yopamiz. So‘ngra qirg‘ichdan o‘tkazilgan pishloqni sepib chiqamiz. Qizigan gaz pechida 180 darajada 5-10 daqiqaga qo‘yib pishirib olamiz. Tayyor bo‘lgan “Lazanyani” dasturxonga tortishdan oldin o‘zingizning didingizga qarab bezatishingiz mumkin. Yoqimli ishtaha!
Guli NOZ tayyorladi
