Cog‘lom, ahil oila – ozod va obod yurt poydevori
“Sog‘lom bola yili” Davlat dasturida mustaqil hayot qurish ostonasidagi yoshlarning nikohdan oldingi tibbiy ko‘rikdan to‘liq o‘tishini ta’minlash, bu boradagi tibbiy xizmat sifatini yanada yaxshilash, to‘y-marosimlarda isrofgarchiliklarga yo‘l qo‘ymaslik, oilada o‘zaro hurmat va mehr-muhabbat muhitini, yuksak ma’naviy-axloqiy qadriyatlarni shakllantirishga qaratilgan chora-tadbirlarni amalga oshirish muhim vazifa sifatida belgilangan.
O‘zbekiston Xotin-qizlar qo‘mitasi tomonidan tashkil etilgan “Eng namunali oila” respublika ko‘rik-tanlovida Qoraqalpog‘iston Respublikasi, viloyatlar va Toshkent shahar bosqichida g‘oliblikni qo‘lga kiritgan oilalar ishtirok etdi.
Tadbirda O‘zbekiston Respublikasi Bosh vazirining o‘rinbosari, Respublika Xotin-qizlar qo‘mitasi raisi E.Bositxonova so‘zga chiqib, Prezidentimiz rahnamoligida oilaning huquqiy manfaatlarini ta’minlash, ularni ijtimoiy himoyalash, moddiy va ma’naviy qo‘llab-quvvatlash masalasiga doimiy e’tibor qaratilayotganini ta’kidlab o‘tdi.
Tanlov yakuniga ko‘ra, Nukus shahridagi 7-“Shoirlar ovuli” mahalla fuqarolar yig‘inida istiqomat qiluvchi Burkit Piyazov oilasi, Navoiy viloyati Qiziltepa tumanidagi “Hofqoriyon” mahalla fuqarolar yig‘inida yashovchi Maqsud Norov oilasi, Farg‘ona viloyati Beshariq tumanidagi “Toshariq” mahalla fuqarolar yig‘inida istiqomat qiluvchi Murodjon Yusupov oilasi g‘olib deb topildi. Shuningdek, o‘ndan ortiq yo‘nalish bo‘yicha sovrindorlar aniqlanib, ularga diplom hamda esdalik sovg‘alari topshirildi.
M.XO‘JAMURODOVA,
“Sog‘lom avlod” muxbiri
