Ranglarga burkangan olam
2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda 2018 yil “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga doir Davlat dasturi ijrosini ta’minlash, o‘sib kelayotgan yosh avlodni har tomonlama barkamol, aqlan yetuk, jismonan baquvvat insonlar etib tarbiyalash, iqtidorli bolalarni qo‘llab-quvvatlash va ularni rag‘batlantirish maqsadida “Sog‘lom avlod uchun” xalqaro xayriya fondi tomonidan keng doiradagi tadbirlar o‘tkazib kelinmoqda.
1997 yildan buyon muntazam tashkil etib kelinayotgan “Kamalak jilosi” rasmlar ko‘rik-tanlovi ana shunday loyihalardan biri bo‘lib, ushbu festival iqtidorli yoshlarni aniqlash, ularda tasviriy san’at va badiiy ijodga bo‘lgan qiziqishni mustahkamlashga xizmat qilmoqda.
“Sog‘lom avlod uchun” xalqaro xayriya fondi, O‘zbekiston Respublikasi Xalq ta’limi vazirligi, “Sen yolg‘iz emassan” jamg‘armasi, O‘zbekiston Badiiy Akademiyasi bilan hamkorlikda tashkil etilgan mazkur bellashuv bu yil har qachongidan-da o‘zgacha ruhda o‘tdi. Tanlovda respublikamizdagi “Mehribonlik” uylarining 1 ming 200 nafar tarbiyalanuvchisi ishtirok etib, viloyat bosqichlarida g‘olib deb topilgan 160 dan ortiq akvarel rasmlar va 100 dan ortiq amaliy san’at asarlari mazkur ko‘rik-tanlovning yakuniy bosqichiga taqdim etildi. Hakamlar hay’ati a’zolari tomonidan tasviriy asarlar yo‘nalishida 4 yoshdan 10 yoshgacha bo‘lgan ishtirokchilardan 3 nafar, 10 yoshdan 16 yoshgacha bo‘lgan ishtirokchilardan Z nafar, amaliy san’at asarlari yo‘nalishida 4 yoshdan 10 yoshgacha bo‘lgan ishtirokchilardan Z nafar, 10 yoshdan 16 yoshgacha bo‘lgan ishtirokchilardan Z nafar jami 12 nafar g‘olib aniqlandi. Qolaversa, 10 ta nominatsiya bo‘yicha ham eng saralar saralandi.
Ko‘rgazma davomida Toshkent shahrining 21-, 22-, 23-, 30-“Mehribonlik” uylarining iqtidorli tarbiyalanuvchilari o‘rtasida tezkor rasmlar ko‘rik-tanlovi ham tashkil etilib, barcha ijodiy ishlar shu vaqtning o‘zida hay’at a’zolari tomonidan baholandi.
– “Kamalak jilosi” rasmlar ko‘rik-tanlovining yakuniy bosqichida “Yuksaklikka intilgan Vatanim” nomli suratim bilan qatnashdim va yakunda faxrli 1-o‘ringa loyiq ko‘rildim. Bundan juda ham xursandman, – deydi Jizzax viloyatidagi 29-“Mehribonlik” uyi tarbiyalanuvchisi Shoxruh Meliboyev.
Tanlov so‘nggida g‘oliblar “Sog‘lom avlod uchun” xalqaro xayriya fondi hamda “Sen yolg‘iz emassan” jamg‘armasi tomonidan diplom va esdalik sovg‘alari bilan taqdirlandi.
X.HUSENOVA
