Yangi film namoyishi
Millionlab insonlarni o‘z qurboniga aylantirib kelayotgan odam savdosi masalasiga qarshi xalqaro miqyosda ko‘rilayotgan keng ko‘lamli chora-tadbirlarga qaramay, ushbu illat hanuz jahon mamlakatlarning eng dolzarb muammolaridan biri sifatida e’tirof etilmoqda.
Respublikamizda ham odam savdosiga qarshi kurashishga jiddiy e’tibor qaratilmoqda. Ko‘zda tutilgan maqsad va vazifalarga erishishda albatta, targ‘ibot-tashviqot ishlari ham muhim o‘rin tutadi.
Ushbu mavzuga bag‘ishlab poytaxtimizdagi Alisher Navoiy nomidagi kino saroyida «D.Vision. Pro.» hamda «Lola Film» kinostudiyalari ijodkorlari tomonidan yaratilgan yangi «Qadamlar» deb nomlangan badiiy filmning premyerasi bo‘lib o‘tdi.
Filmda jinoyatchilarning shirin va’dasiga uchib, og‘ir mehnat sharoitiga tushib qolgan yosh yigitlarning boshidan kechirganlari, shuningdek, chet elni havas qilib, aldanib qolgan va keyin afsus-nadomatdan iztirob chekkan qizlarning qismati tasvirlangan. Farzandini ko‘zlari to‘rt bo‘lib kutayotgan onaizorning holati ta’sirchan usulda ifoda etilgan. Ana shu voqealar orqali tomoshabin yana bir karra ogohlikka, hushyorlikka chaqiriladi. Bunda albatta, film ijodkorlarining mahoratini aytib o‘tmasdan iloj yo‘q. Unda ishtirok etgan ijodkorlarning asosiy qismi debyutantlardan iborat bo‘lib, barchasi san’at sohasi vakillaridir. Film rejissyori Ozod Shamsiddinov uchun bu dastlabki professional ish hisoblanadi. G‘oya muallifi Umar Yo‘ldoshev, ssenariy mualliflari esa Abduqayum Yo‘ldoshev hamda Ozod Shamsiddinovlardir.
Filmdagi asosiy rollarni Sherali Ortiqov, Muhabbat Abdullayeva, Shohida Ismoilova, Feruza Meliboyeva, Arslon Yesenov, Akmal Nazarovlar mahorat bilan ijro etgan.
Xulosa qilib aytganda, film voqealari o‘ta ta’sirli va aktyorlarning yuqori darajadagi mahorati bilan o‘z yechimini topgan.
O‘ylaymizki, bu kabi filmlar osoyishta hayotga xavf solayotgan muammolardan biri – odam savdosiga qarshi kurashishda o‘z samarasini beradi.
Mayna HASANOVA
