Жаҳон шахмат усталари Тошкентда баҳслашмоқда
Ўзбекистон Тасвирий санъат галереясида шахмат бўйича хотин-қизлар ўртасида Халқаро шахмат федерацияси – ФИДЕ Гран-присининг учинчи босқич баҳслари бошланди. Халқаро шахмат федерацияси шафеълигида ўтказилаётган ушбу нуфузли спорт анжумани Ўзбекистон Маданият ва спорт ишлари вазирлиги, Шахмат федерацияси ҳамда «Ўзбекистон маданияти ва санъати форуми» жамғармаси ҳамкорлигида ташкил этилди.
Мусобақанинг очилишида Президентимиз Ислом Каримов раҳнамолигида мамлакатимизда навқирон авлодни жисмонан соғлом, маънавий етук, юксак интеллектуал салоҳият эгалари этиб тарбиялашнинг муҳим воситаси сифатида спортни жадал ривожлантиришга алоҳида эътибор қаратилаётгани таъкидланди.
– Ўзбекистонда шахмат бўйича йирик спорт анжуманларини юқори савияда ташкил этиш яхши анъанага айланган, – деди Халқаро шахмат федерацияси (ФИДЕ) президенти Кирсан Илюмжинов. – Ўзбек шахматчиларининг халқаро майдонлардаги ғалабалари ёш авлоднинг жисмоний ва маънавий баркамол инсонлар бўлиб вояга етиши учун кўрсатилаётган улкан эътибор ва ғамхўрликнинг амалдаги ифодасидир. Ўзбекистонда болалар спорти таълим-тарбия жараёнининг узвий қисмига айлангани таҳсинга лойиқ.
Олти халқаро турнирдан иборат хотин-қизлар ўртасидаги ФИДЕ Гран-приси жаҳон шахмат тожи учун курашиш имконини берадиган мусобақадир. 2013-2014 йилларда ўтказиладиган ушбу турнирда умумий ҳисобда 18 нафар шахматчи иштирок этади. Ҳар бир босқичда 12 нафардан шахматчи ўйнайди. Шу тариқа уларнинг ҳар бири Гран-при сериясидаги тўрттадан турнирда қатнашади. Якунда энг кўп балл жамғарган шахмат устаси 2015 йилда амалдаги жаҳон чемпиони билан шахмат тожи учун ўн партиядан иборат учрашув ўтказиш имконига эга бўлади.
Ўзбекистон Тасвирий санъат галереясида бошланган хотин-қизлар ўртасида ФИДЕ Гран-присининг учинчи босқичида мамлакатимиз шарафини Осиё чемпионати ва Осиё ўйинлари кумуш медали совриндори, ўзбек қизлари орасида биринчи бўлиб халқаро гроссмейстер унвонини қўлга киритган истеъдодли ёш шахматчимиз Нафиса Мўминова ҳимоя қилади.
Бу босқичда жаҳон шахмат олимпиадаси, жаҳон ва Европа чемпионати совриндори грузиялик Бела Хотенашвили, қизлар ўртасида кўпкарра жаҳон чемпиони ҳиндистонлик Хампи Конеру, Осиё чемпионати кумуш медали совриндори ва Хитой чемпиони Цзю Веньцзюнь, жамоавий жаҳон чемпионати, Европа чемпионати ғолибаси, тезкор шахмат – блиц бўйича жаҳон чемпиони украиналик Екатерина Лагно, жаҳон ва Европа чемпиони болгариялик Антоанета Стефанова, 20 ёшгача қизлар ўртасида жаҳон чемпиони ҳиндистонлик Харика Дроновалли, жаҳон ва Европа чемпиони, жаҳон шахмат олимпиадаси икки карра ғолибаси россиялик Александра Костенюк, Европа чемпионати совриндори ва олти карра Арманистон чемпиони Элина Даниэлян, 18 ёшгача қизлар ўртасида жаҳон ва Европа чемпиони россиялик Ольга Гиря, 20 ёшгача қизлар ўртасида жаҳон чемпиони хитойлик Чжао Сюэ, халқаро турнирлар ғолибаси қозоғистонлик Гулисхон Накбоева ҳам дона сурмоқда.
Мусобақа қоидасига кўра, ФИДЕ Гран-приси босқичларида шахматчилар бир даврали тизимда жами 11 партия ўйин ўтказади. Энг кўп очко жамғарган уч нафар спортчи босқич ғолиби ва совриндорлари сифатида тақдирланади.
Зоҳир ТОШХЎЖАЕВ,
ЎзА мухбири
