Shaxmatchilarimizni dunyo tan olmoqda
BAAning Sharja shahrida shaxmat bo‘yicha nufuzli xalqaro turnir bo‘lib o‘tdi.
Standart yo‘nalishda tashkillashtirilgan musobaqada 13 davlatdan yuzdan ziyod yosh shaxmatchi ishtirok etdi. Hamyurtimiz Aziz Salayev shveysarcha tizimda 9 turdan iborat musobaqada muvaffaqiyat qozondi.
Yana bir shaxmatchimiz Nodirbek Abdusattorovning Shveysariyada qayd etgan natijalari tahsinga loyiq. Dunyo shaxmat tarixida ayni paytdagi eng yosh grossmeysteri hisoblangan Nodirbek Abdusattorov (14 yosh) Shveysariyaning Bile shahrida o‘ziga xos seans namoyish etdi. Iste’dodli hamyurtimiz bir vaqtning o‘zida 16 yoshgacha bo‘lgan 16 nafar shaxmatchiga seans o‘tdi va partiyalarning 15 tasida g‘alaba qozondi. Faqat bitta doskada durang natija qayd etildi, xolos.
