Maroqli hordiq
Poytaxtimizning Yashnobod tumanida joylashgan 255-umumta’lim maktabi qoshidagi “Nihol” yozgi sport-sog‘lomlashtirish oromgohida 120 nafardan ortiq bola bo‘sh vaqtini maroqli o‘tkazmoqda. Bu yerda ular turli fan to‘garaklari va sport mashg‘ulotlarida shug‘ullanib, bilim va ko‘nikmalarini oshirmoqda.
Jumladan, “Matematikani o‘rganamiz” va , “Ranglar jilosi” to‘garaklarida o‘quvchilarga hisob amallarining sir-asrorlari, rasm chizish qoidalari chuqur o‘rgatilmoqda. “Mohir qo‘llar” to‘garagida esa qizlarning bir-biridan chiroyli tikkan kashta, do‘ppi, uy-ro‘zg‘or uchun mo‘ljallangan liboslarini ko‘rib, ko‘zingiz quvnaydi.
– Bu yerda yoshlarning dam olishi uchun barcha sharoit mavjud, – deydi maktabning ma’naviy-ma’rifiy ishlar bo‘yicha direktor o‘rinbosari Nurjahon Xolova. – Oromgohimizning har bir kuni tizimli shaklda ishlab chiqilgan tadbirlar bilan uyg‘un o‘tadi. To‘garaklarda faol qatnashayotgan bolalar turli sovg‘alar, kitoblar bilan rag‘batlantiriladi. Asosiysi, yozgi ta’til davomida ularning bo‘sh vaqti samarali o‘tmoqda.
Shuningdek, bu yerda o‘quvchilarni jismonan chiniqtirish maqsadida futbol, shaxmat-shashka va stol tennisi kabi sport to‘garaklari faoliyati ham yo‘lga qo‘yilgan. Bolalar salomatligi esa shifokorlarning doimiy nazoratida.
Zebo MURODOVA
