Руслан полвоннинг янги рекорди
Россиянинг Қозон шаҳрида ўтаётган XXVII Жаҳон универсиадасида оғир атлетикачимиз Руслан Нуриддинов иккинчи марта рекорд ўрнатди.
Оғир атлетика бўйича 105 килограмм вазн тоифасидаги беллашувларда йигирмага яқин мамлакат вакиллари куч синашди. Спортнинг ушбу тури бўйича жаҳон чемпионати кумуш медали совриндори, Осиё чемпиони Руслан Нуриддинов ўзбек ёшлари дунёда ҳеч кимдан кам эмаслиги ва кам бўлмаслигини яна бир карра намойиш қилди.
Моҳир спортчимиз штангани даст кўтаришда энг юқори – 190 килограмм натижа қайд этиб, аввалги рекорд кўрсаткичини етти килограммга оширди. Штангани силтаб кўтаришда 222 килограмм оғирликни бўйсундира олган ҳамюртимиз иккикураш бўйича 412 килограмм натижа билан аввалги рекордни яна 12 килограммга оширди. Олтин медаллар учун курашдаги асосий рақобатчилари – россиялик Андрей Деманов ва жаҳон рекордчиси Давид Беджанянни ортда қолдирган ўзбек полвони Жаҳон универсиадаси чемпиони бўлди.
Самбо бўйича 90 килограмм вазн тоифасидаги беллашувларда қатнашган Суҳроб Остонаев терма жамоамиз ҳисобига навбатдаги бронза медални келтирди. У украиналик Андрей Хордиенко, исроиллик Борис Кибрик, франциялик Валентин Жордан устидан қозонган ғалабаси эвазига шоҳсупанинг учинчи поғонасига кўтарилди.
Айни пайтгача мамлакатимиз спортчилари Жаҳон универсиадасида икки олтин, етти кумуш, тўққиз бронза, жами 18 медаль жамғарди.
Зоҳир ТОШХЎЖАЕВ,
ЎзА мухбири
