Тунда кеч овқатланиш салбий оқибатларга олиб келади
Америкалик олимлар кечки овқатни ҳаддан ортиқ кеч истеъмол қилиш тана биологик тартиби ва терини ултрабинафша нурлардан ҳимоя қилувчи ферментлар фаолиятининг бузилишига олиб келишини исботлади.
Икки гуруҳ сичқонларда тажриба ўтказилди. Уларга турли вақтларда емиш берилди. Тадқиқот натижасида, кечки соат тўққиздан кейин овқатлантирилган сичқонларда ултрабинафша нурларидан зарарланган терини тикловчи ферментлар кундузи жуда суст ишлагани маълум бўлди.
Бундан ташқари, ушбу гуруҳдаги сичқонларда тери касалликларининг ривожланиш хавфи ортди. Овқатланиш тартиби меъёрида бўлган сичқонларга эса ултрабинафша нурлари унчалик таъсир ўтказмади.
Мутахассислар биологик тартибнинг бузилиши қуёш нурларига нисбатан мўртликни юзага келтиришини, бу ҳолатнинг узоқ давом этиши эса терининг эрта қариши ва саратон касалликларига ҳам олиб келиши мумкинлигини таъкидлашмоқда.
Миржалол Мадвалиев тайёрлади.
