Тадбири борга шароит бисёр
Бугун юртимизда ишбилармон хотин-қизларнинг истиқболли лойиҳаларини қўллаб-қувватлашга алоҳида эътибор қаратилмоқда. Қувонарлиси, тадбиркор аёллар аҳоли бандлигини таъминлаш билан бирга иқтисодиётимиз ривожига муносиб улуш қўшмоқда.
Мамлакатимизда бу борадаги муносабатларни тартибга солиш мақсадида “Тадбиркорлик фаолиятини янада қўллаб-қувватлаш ва ривожлантириш чора-тадбирлари тўғрисида”ги қарор қабул қилинди. Ушбу ҳужжатда кичик бизнес ва хусусий тадбиркорликни янада ривожлантириш, иқтисодиётни юксалтириш, янги иш жойларини очиш, аҳоли бандлигини таъминлаш, шунингдек, хусусий тадбиркорлик фаолиятини ташкил этиш ҳамда юритиш учун қўшимча қулай шароитлар яратиш мақсад қилиб белгиланган.
Тошкент вилояти Юқори Чирчиқ туманидаги Янгибозор қишлоғида таваллуд топган Гулруҳ Эргашева ҳам ана шу имкониятлардан унумли фойдаланиб, ўз тадбиркорлик фаолиятини йўлга қўйди. Иқтисодчилар оиласида вояга етган ёш тадбиркор ҳозирда Тошкент давлат иқтисодиёт университетида таҳсил олмоқда. Гулруҳ 2014 йилда “Тахмина” номи билан гўзаллик салони ташкил этиб, ўз тадбиркорлик фаолиятини бошлаган. Кейинчалик нон ва қандолат мақсулотлари ишлаб чиқариш, тикув цехи, тўй либослари, компьютер хизматларини ҳам йўлга қўйди. Корхонада ишловчилар сони 2015 йилда 7 нафарни ташкил қилган бўлса, бугунга келиб келиб бу рақам 16 нафарга етди.
– Келажак учун кўплаб истиқболли режалар тузганман. Насиб бўлса тадбиркорлик фаолиятимни кенгайтириб, хизмат турларини 12 тага етказмоқчиман. Иш ўрнини яна 10 тага кўпайтириб, коллеж битирувчилари бандлигини таъминлаш ниятим бор, – дейди ёш тадбиркор. – Жумладан, ўқув маркази ташкил қилиб, вилоятимизнинг энг чекка туманларида унинг филиалларини очиш, чет эл инвестицияларини жалб қилиб, миллий ипак мато яратиш, чойшаблар ишлаб чиқариш ва корхона ҳисобидан хайрия ишларини амалга оширишни режалаштирганман.
Бугун юртимизда хотин-қизларнинг давлат ва жамият қурилишидаги фаоллигини ошириш, уларнинг тадбиркорлик борасидаги ташаббусларини қўллаб-қувватлаш учун яратилаётган имкониятлар бисёр. Бундан ташқари мамлакатимизда тадбиркор аёллар учун турли семинар-тренинглар ўтказилмоқдаки, бундан кўзланган асосий мақсад ҳам ишбилармон хотин-қизларга кенг шароитлар яратишдир. Жумладан, Ўзбекистон хотин-қизлар қўмитаси, Германиянинг мамлакатимиздаги элчихонаси ва яна бир қанча давлат ва жамоат ташкилотлари ҳамкорлигида ташкил этилаётган “Маҳорат дарслари” тадбиркорлик билан шуғулланаётган аёлларга ўз фаолиятларини янада ривожлантиришига туртки бўлмоқда.
Чарос ЭРКИН қизи
