Er-xotinning umumiy mulkiga nimalar kiradi?

Turmush o‘rtog‘im bilan nikohimizni bekor qilmoqchimiz. U “uydan haydayman, hech narsa bermayman”, deb dag‘-dag‘a qilayapti. Barcha mol-mulk uning puliga olinganini vaj qilyapti. Mol-mulklarda mening ham hissam borligini qanday isbotlashim mumkin?

D. BOTIROVA, Qarshi shahri

– Er-xotinning turmush davomida orttirgan mol-mulki yuzasidan nizoni hal etishda “Oila” kodeksining 23-moddasiga rioya etiladi. Unga ko‘ra agar nikoh shartnomasida boshqacha hol nazarda tutilmagan bo‘lsa, er va xotinning nikoh davomida orttirgan mol-mulki, shuningdek, nikoh qayd etilgunga qadar bo‘lajak er-xotinning umumiy mablag‘lari hisobiga olingan mol-mulki ularning umumiy mulki hisoblanadi. Er va xotindan biri uy-ro‘zg‘or ishlarini yuritish, bolalarni parvarish qilish bilan band bo‘lgan yoki boshqa uzrli sabablarga ko‘ra mustaqil ish haqi va boshqa daromadga ega bo‘lmagan taqdirda ham er va xotin umumiy mol-mulkka nisbatan teng huquqqa ega bo‘ladi. Er va xotinning nikoh davomida orttirgan mol-mulklari jumlasiga har birining mehnat, tadbirkorlik va intellektual faoliyat natijalaridan orttirgan daromadlari, ular olgan pensiyalar, nafaqalar, shuningdek, maxsus maqsadga mo‘ljallanmagan boshqa pul to‘lovlari kiradi.