Xayrli ishning xosiyati xush
Olmaliq shahrida “Sog‘lom avlod uchun” xalqaro xayriya jamg‘armasining 20 yilligiga bag‘ishlab “Sog‘lom avlod – millat kelajagi” mavzusida anjuman bo‘lib o‘tdi.
Jamg‘armaning Toshkent viloyati mintaqaviy filiali faoliyatiga bag‘ishlangan mazkur anjumanda aholi salomatligini saqlash, onalik va bolalikni muhofaza qilish, yoshlar orasida sog‘lom turmush tarzini targ‘ib qilish, ijtimoiy ko‘makka muhtoj oilalarni qo‘llab-quvvatlash borasida olib borilayotgan ishlar tahlil qilindi.
– Viloyat tibbiy, ijtimoiy patronaj brigadasi shifokorlari tomonidan o‘tgan davr mobaynida 200 ming nafardan ortiq fuqarolar tibbiy ko‘rikdan o‘tkazildi, – deydi jamg‘arma mutaxassisi Ra’no Abdurazzoqova. – Hududda istiqomat qiluvchi 20 nafardan ortiq bemor bolalar xorijiy davlatlar klinikalarida sog‘lomlashtirilgan.
Darhaqiqat, mamlakatimizda aholiga tibbiy xizmat ko‘rsatish sifati yangi bosqichga ko‘tarildi. Sog‘liqni saqlash muassasalarining zamonaviy tibbiy asbob-uskunalar bilan jihozlash, tibbiyot xodimlarining malakasini oshirish, aholining ijtimoiy himoyaga muhtoj qatlamini qo‘llab-quvvatlash borasida dasturiy chora-tadbirlar amalga oshirilmoqda. Bu jarayonda “Sog‘lom avlod uchun” xalqaro xayriya jamg‘armasi ham faol ishtirok etayotgani quvonarli.
Konferensiya so‘nggida “Mehribonlik uyi” tarbiyalanuvchilari, Olmaliq shahridagi “San’at g‘unchalari” tanlovi, “Navro‘z sadolari” festivali sovrindorlari ishtirokidagi konsert dasturi yig‘ilganlarga ko‘tarinki kayfiyat baxsh etdi.
Tadbirda “Sog‘lom avlod uchun” xalqaro xayriya jamg‘armasi Boshqaruvi raisi S.Inamova, Toshkent viloyati hokimi o‘rinbosari, Xotin-qizlar qo‘mitasi raisi S.Fayziyeva ishtirok etdi.
I. XUDOYQULOV
“Sog‘lom avlod” muxbiri
