Joriy yilda “O‘zbekengilsanoat” tomonidan beshta davlatda savdo uylari ochiladi
2016 yilda “O‘zbekengilsanoat” aksiyadorlik jamiyati korxonalari 1 milliard 146 million dollarlik mahsulot eksport qilgan. Dunyoning 54 mamlakatiga yetkazib berilgan ushbu mahsulotlarning 40 foizidan ortig‘ini qo‘shimcha qiymatli tovarlar tashkil etadi.
Milliy matbuot markazida tashkil etilgan matbuot anjumani “O‘zbekengilsanoat” AJ korxonalarida mahsulotlar eksporti hajmini oshirish, geografiyasini kengaytirishga bag‘ishlandi.
Mamlakatimiz iqtisodiyotida tobora salmoqli o‘rin egallayotgan to‘qimachilik sanoatida 105 mingdan ortiq ishchi-xizmatchi mehnat qilmoqda. 440 sanoat korxonasi, shu jumladan, 28 yirik ishlab chiqaruvchini o‘zida birlashtirgan “O‘zbekengilsanoat” AJ tarmoqning yetakchisi sifatida ishlab chiqarish va eksport hajmini muttasil oshirib bormoqda.
O‘tgan yili jamiyat korxonalari tomonidan ishlab chiqarilgan sanoat mahsulotlari hajmi 2015 yilga nisbatan 18,1 foizga ortgan bo‘lsa, eksport ko‘rsatkichlari 132 foizni tashkil etdi. Eksportda tayyor mahsulotlar ulushi tobora ortmoqda. Xorijga yuborilayotgan mahsulotlar ro‘yxati o‘tgan yil bambuk va modal kalava ip, aralash kalava ip, jakkard va ringel mato singari yangi nomlar bilan boyidi.
Xorijdagi savdo uylarining soni ortib bormoqda. 2016 yilda ular 44 tani tashkil qilgan bo‘lsa, joriy yilda Rossiya, Belarus, Ukraina, Qozog‘iston va Tojikistonda yana beshta tijorat nuqtasini ochish rejalashtirilgan.
Mamlakatimiz ishlab chiqaruvchilarining mahalliy va xorijiy ko‘rgazmalarda ishtirokini ta’minlash yuzasidan tizimli ishlar amalga oshirilmoqda. O‘tgan yilda tarmoqning 200 dan ortiq korxonasi 21 ko‘rgazmada ishtirok etdi. 1 milliard dollarlikdan ortiq shartnoma imzolandi. Bu boradagi ishlar joriy yilda ham davom ettirilib, 26 xalqaro ko‘rgazmada mamlakatimiz tadbirkorlari ishtirokini ta’minlash ko‘zda tutilgan.
Tashqi iqtisodiy aloqalar, investitsiyalar va savdo hamda Tashqi ishlar vazirliklari bilan hamkorlikda biznes-forumlar, “biznes-biznesga” shaklida bevosita muzokaralar o‘tkazish yo‘li bilan yangi, salohiyatli xaridorlarni izlash, mahalliy ishlab chiqaruvchilar va xorijiy iste’molchilar o‘rtasida hamkorlik o‘rnatish ishlari faollashtirilgan.
Bolgariya, Turkiya, Ukraina va Belarusda o‘tkazilgan shunday tadbirlar natijasida to‘qimachilik mahsulotlarini yetkazib berish bo‘yicha qiymati 50 million dollardan ziyod eksport shartnomalari imzolandi. Hozir MDH hamda Yevropa Ittifoqi mamlakatlari, shuningdek, Turkiya va Eron bilan umumiy qiymati 350 million dollarlik qo‘shimcha eksport bitimlarini imzolash ustida ish olib borilmoqda.
– Davlatimiz rahbarining 2016 yil 21 dekabrdagi “2017-2019 yillarda to‘qimachilik va tikuv-trikotaj sanoatini yanada rivojlantirish chora-tadbirlari dasturi to‘g‘risida”gi qarori eksportga yo‘naltirilgan mahsulotlar ishlab chiqarish hajmi va turlarini kengaytirishda muhim dasturilamal bo‘ldi, – deydi “O‘zbekengilsanoat” aksiyadorlik jamiyati boshqarma boshlig‘i Jasur Rustambekov. – Unga ko‘ra, 2020 yilgacha umumiy qiymati 2 milliard 200 million dollarga teng 132 investitsiya loyihasi amalga oshiriladi. E’tiborlisi, loyihalarning qariyb 50 foizini xorijiy investitsiya va kreditlar hisobidan moliyalashtirish belgilangan.
Mazkur dasturning amalga oshirilishi tarmoqning yillik eksport salohiyatini 2 milliard 500 million dollarga yetkazish, qo‘shimcha 25 mingdan ziyod yangi ish o‘rni yaratilishiga imkon beradi.
Mahsulotlarni eksportga olib chiqishda internet tarmog‘i imkoniyatlaridan ham faol foydalanilmoqda. “O‘zbekengilsanoat” aksiyadorlik jamiyati, jamiyat huzuridagi to‘qimachilik mahsulotlari reklamasi va marketingi agentligi saytlarida ishlab chiqarilayotgan mahsulotlar, narxlar to‘g‘risidagi ma’lumotlar, marketing obzorlari, tarmoqdagi yangiliklar haqidagi axborot muntazam e’lon qilib borilmoqda.
Har yili to‘qimachilik mahsulotlari katalogi chop etilib, turli ko‘rgazma va biznes-forumlar davomida mamlakatimiz to‘qimachilik korxonalarining salohiyatli sheriklariga tarqatilmoqda. Savdo maydonchalari va internet saytlari yordamida tovarlarni sotish va pochta orqali yetkazib berish amaliyoti keng qo‘llanilmoqda.
“O‘zstandart” agentligi
Axborot xizmati
