Qalbni uyg‘otuvchi satrlar
Bemorlik – asli bedorlikdir.
Jaloliddin Rumiy
***
Ko‘ngilning qatida nidoga yo‘l bor,
Iymondan kechganga aftoda yo‘l bor.
Yaratgan qoshiga borar yo‘l qayda?
Bemorning qalbidan Xudoga yo‘l bor.
***
Olam ellik varaq, yuz varaq kitob,
Kitobga sarlavha erur ofitob.
Bu dunyoning ganji o‘zimman, dema,
Hayot bir jumlayu, chehrang bir niqob.
***
Tog‘larni o‘zingga etmagin taqqos,
Mag‘rur cho‘qqilar ham qulaydi gurros.
Anglaysan, bu jonning zaif ekanin
Bemorning qoshida o‘tirsang biroz.
***
Xastalik – taqdirning jilovi axir,
Oshiqma, Xudoning sinovi og‘ir.
Qalbingda manmanlik yaprog‘in yoysa,
Jismingda jarohat bo‘ladi zohir.
***
Titapoya qildik va katta bo‘ldik,
Birida sog‘likda, bir dardda bo‘ldik.
Zamin ko‘k qoshida yoyilgan rasta,
Ajab savdolardan hayratda bo‘ldik.
***
Sog‘ bo‘lsang kiftingga qanot istaysan,
Bemor bo‘lsang sabru sabot istaysan.
Sen qachon tuyasan hayot zavqini,
Qachon bu joningga rohat istaysan?
***
Hurkak kiyik nima, bemor nimadir?
Ikkisin ko‘ksida bedor nimadir?!
Ovchi va ajalning pistirmasida
Yana sodir bo‘lar takror nimadir!
***
Bemorning duosi daryodir, ko‘ldir,
Hol so‘ra, qalbingni quvvatga to‘ldir.
To‘shakda qo‘l ochib yotibdi, ana,
Jilmayib ol, so‘ra, yugur, bor, ulgur!!!
***
Tuppa-tuzuk edi, qochibdi tobi,
Yotibdi, ko‘ksida hayot kitobi.
O‘qidi, angladi hikmatin, biroq
So‘nganda quvvati, shahdi-shitobi.
***
Koinot oldida zamin bir nuqta,
Kuching yetar bo‘lsa, sen Yerni to‘xtat!
Ey odam, jar solma, ovloqda turib,
Bugun sog‘, erta sob, indinga rixlat…
Faxriddin Hayit
