Tarbiya
Richard ShART
Sandra bolalarini sirk tomoshasiga yetaklab keldi. Chipta olish maqsadida kassaga yaqinlashdi:
– Olti yoshga yetmaganlarga tekin, kattalarga esa besh dollar.
– Kenjam uch yashar, to‘ng‘ichim esa sakkizga qadam qo‘ydi. Iltimos, bizga 2 ta chipta bersangiz.
Chipta sotuvchi ayol yoshiga nisbatan jussasi kichkina bolakayga qaradi-da, Sandraning rostgo‘yligiga tan berib:
– Xonim, to‘ng‘ichingizning yoshini aytmay, tekinga ichkariga olib kirishingiz mumkin edi. Men hatto buni fahmlamasdim ham, – dedi.
– Ehtimol, lekin o‘zining necha yoshdaligini biladigan bolam gapimning yolg‘onligini darhol ilg‘agan bo‘lardi. Men hozir uning oldida yolg‘on so‘zlasam, ertaga u yolg‘onni suv qilib ichib yuboradigan darajada mug‘ombir bo‘lib ulg‘ayadi. “Qush uyasida ko‘rganini qiladi”.
Rus tilidan Shahnoza RAHMONOVA tarjimasi
