“GULSHANI ODAM SAMARI SO‘ZDURUR”
Alisher NAVOIY
Odamiy badandur, himmat anga ruh,
Himmat ahlidin olamda yuz ming futuh.
Odam bir badan bo‘lsa, himmat unga ruh(jon)dir, olamdagi barcha ezguliklar himmat ahli tufaylidir.
* * *
Ushoq qand oq tuzga monand erur,
Va lekin biri tuz, biri qand erur.
Ko‘rinishda shakarning tuzdan farqi yo‘qdir, lekin bittasi tuz bittasi qanddir.
* * *
Ulcha erur tiflg‘a shoyista ish,
Bilki, kichiklikda erur parvarish.
Bolaga loyiq ish — uni yoshligida tarbiyalashdir.
* * *
Qatraga chun tarbiyat etdi sadaf,
El boshiga chiqqucha topti sharaf.
Sadaf bir tomchini tarbiya qilgach, tarbiya natijasida ul tomchi odamlarning boshlariga ko‘tarilish darajasiga yetdi.
* * *
Yaxshilig‘ gar qilmasa, bori
yomonlig‘ qilmasa,
Kim yomonlig‘ qilmasa,
qilg‘ancha bordir yaxshilig‘.
Qani endi, yaxshilik qilmaydigan kishi sira yomonlik ham qilmasa! Uning yomonlik qilmagani yaxshilik qilgan bilan barobar.
* * *
Rostdur ulkim, nazari to‘g‘ridur,
Kim iligi egridur, ul o‘g‘ridur.
Nazari to‘g‘ri kishining o‘zi ham to‘g‘ri, qo‘li egri kimsa esa o‘g‘ridir.
* * *
Odamiyg‘a yaxshi ko‘p avsof erur,
Lek alarning ashrafi insof erur.
Insonga xos yaxshi fazilatlar ko‘p, lekin ularning eng afzali insofdir.
* * *
Ne qushkim, bo‘lsa himmatdin qanoti,
Emas past oshyonga iltifoti.
Qanoti himmatdan iborat bo‘lgan qushning past uyaga mayli bo‘lmaydi.
* * *
Ma’dani inson guhari so‘zdurur,
Gulshani odam samari so‘zdurur.
Insoniyat ma’danlarining qimmatbaho injulari ham so‘zdir. Odamiyat chamanzorining mevasi ham so‘zdur.
* * *
Ki har kim ayon etsa yaxshi qiliq,
Yetar yaxshiliqdin anga yaxshiliq.
Yaxshilikni ravo ko‘rganlarning o‘zlariga ham yaxshilik yetadi.
