Allergiya qanday yuzaga keladi?
Bu har xil moddalarning organizmga tushishi ta’sirida organizmning noodatiy javob reaksiyasidir. Shu reaksiyani keltirib chiqaradigan modda allergen deb ataladi. Eng ko‘p tarqalgan allergen omillari bu-chang, mog‘or va ozuqa mahsulotlari hisoblanadi. Allergen omillari nafaqat bahor oylarida, balki yil davomida bizni qurshab yuradi.
Barcha allergenlar quyidagi turlarga bo‘linadi:
Nafas yo‘llari orqali tushadi: har xil daraxtlar, gullar va o‘simliklarning changi, hayvonlar yunglari, qazg‘oq va zamburug‘lar. Ro‘zg‘orda va ishlab chiqarishda ishlatiladigan kimyoviy vositalar, o‘lik hasharotlarning tana parchalari.
Teri orqali tushadigan: kiyim-kechak, pardoz vositalari, metallar, tozalash uchun mahsulotlar, dori vositalari va o‘simliklar.
Oziq-ovqat orqali tushadigan: ozuqa mahsulotlari, biologik qo‘shimchalar.
In’yeksiya yo‘llari orqali tushadigan: dori vositalari, hasharotlarning chaqishi.
Barcha kasalliklar qatori allergiya ham o‘z sabablariga ega va shu sabablarni aniqlab, uning rivojlanish ehtimolini kamaytirishimiz mumkin.
Tez-tez shamollash, ko‘pincha viruslar chaqiradigan allergiyaning qo‘zg‘atishi yoki avj olishiga turtki bo‘ladi. Allergiyaning alohida sabablarini aniqlash uchun, albatta vrach-allergologga murojat qilish va mutaxassis shifokorning tavsiyalarini olish zarur.
