Charaqlagan oftob – xushnudlik sababchisi

Ruhiyatimizdagi bu o‘zgarishlarga oftobning foydali ultrabinafsha nurlari tufayli terimiz ishlab chiqaruvchi D vitamini sababchi ekan. 80 foiz “quyosh vitaminni” oftobda qorayganimiz uchun jigar va teri osti yog‘ qatlamida yig‘iladi. Uning 20 foizi esa oziq-ovqat mahsulotlari bilan organizmga tushadi. Bir kunda 100 gr. losos balig‘ini iste’mol qilish yoki yog‘li sut mahsulotlarini tanovul etishdan ko‘ra quyoshli kunlarda ochiq havoda sayr etish ko‘proq foydaliroq, deyishmoqda mutaxassislar.

D vitamini yetishmovchiligi, ayniqsa, ortiqcha vaznli insonlarda uchraydi. Sababi bu darmondori yog‘da eriydi. Teri osti yog‘ qatlami ko‘p odamlarda ushbu vitaminning miqdori qonda kamayib ketadi. Shuningdek, keksalarda ham vaqt o‘tishi bilan D vitamini yomon o‘zlashtiriladi. Yana me’da-ichak tizimida yallig‘lanish kasalliklari, Kron xastaligi mavjud bemorlarda ham bu vitamin yaxshi so‘rilmaydi. Qondagi D vitamini miqdorini qon tahlilini topshirib bilish mumkin. Organizmda ushbu darmondori kamayib ketsa, odamda osteoporoz (suyaklar mo‘rtligi), mushaklarda bo‘shashish, tanada surunkali og‘riq, qandli diabetning 1 va 2-turi kuzatiladi. Shuningdek, me’da va o‘n ikki barmoqli ichakning yallig‘lanishi, o‘tkir yurak qon-tomir kasalliklari, o‘pka yetishmovchiligi, revmatoidli artrit kuzatiladi. Yana bemorda ruhiy tushkunlik, turli infeksiyalarga tez chalinuvchanlikka moyillik hamda xotiraning susayishi, saraton, erta qarish alomatlari ko‘zga tashlanadi.

GULSHIRIN