Чарақлаган офтоб – хушнудлик сабабчиси

Руҳиятимиздаги бу ўзгаришларга офтобнинг фойдали ультрабинафша нурлари туфайли теримиз ишлаб чиқарувчи Д витамини сабабчи экан. 80 фоиз “қуёш витаминни” офтобда қорайганимиз учун жигар ва тери ости ёғ қатламида йиғилади. Унинг 20 фоизи эса озиқ-овқат маҳсулотлари билан организмга тушади. Бир кунда 100 гр. лосось балиғини истеъмол қилиш ёки ёғли сут маҳсулотларини тановул этишдан кўра қуёшли кунларда очиқ ҳавода сайр этиш кўпроқ фойдалироқ, дейишмоқда мутахассислар.

Д витамини етишмовчилиги, айниқса, ортиқча вазнли инсонларда учрайди. Сабаби бу дармондори ёғда эрийди. Тери ости ёғ қатлами кўп одамларда ушбу витаминнинг миқдори қонда камайиб кетади. Шунингдек, кексаларда ҳам вақт ўтиши билан Д витамини ёмон ўзлаштирилади. Яна меъда-ичак тизимида яллиғланиш касалликлари, Крон хасталиги мавжуд беморларда ҳам бу витамин яхши сўрилмайди. Қондаги Д витамини миқдорини қон таҳлилини топшириб билиш мумкин. Организмда ушбу дармондори камайиб кетса, одамда остеопороз (суяклар мўртлиги), мушакларда бўшашиш, танада сурункали оғриқ, қандли диабетнинг 1 ва 2-тури кузатилади. Шунингдек, меъда ва ўн икки бармоқли ичакнинг яллиғланиши, ўткир юрак қон-томир касалликлари, ўпка етишмовчилиги, ревматоидли артрит кузатилади. Яна беморда руҳий тушкунлик, турли инфекцияларга тез чалинувчанликка мойиллик ҳамда хотиранинг сусайиши, саратон, эрта қариш аломатлари кўзга ташланади.

ГУЛШИРИН