Biz sog‘lom bolalarmiz
Poytaxtimizning Mirzo Ulug‘bek tumanidagi, Feruza mahallasida 1 iyun – Xalqaro bolalarni himoya qilish kuniga bag‘ishlab “Biz sog‘lom bolalarmiz” deb nomlangan bayram tadbiri o‘tkazildi.
Mahalladoshlar bayram bahona bir dasturxon atrofida yig‘ildilar.
– Yurtimiz farzandlarining sog‘lom va barkamol insonlar bo‘lib voyaga yetishi uchun biz kattalar doimo mas’ulmiz, – deydi Feruza mahallasi diniy maslahatchisi Rohat opa Abduxoliqova. – Bugungi bayram ham ana shu maqsad yo‘lida tashkil etildi.
Tadbir doirasida bolalar o‘rtasida o‘tkazilgan shaxmat-shashka musobaqasi haqiqiy bellashuvga aylandi. Aqlni charxlovchi ushbu musobaqada 6 yoshdan 14 yoshgacha bo‘lgan o‘g‘il-qizlar o‘z mahoratini ishga soldilar. Turnirda Muhammadali Normamatov, Davronbek Ahmadjonov, Abduholiq Yusupjonovlar peshqadamlik qildilar.
Tuman madaniyat uyi san’atkorlari bayram tadbiriga ko‘tarinkilik baxsh etdi.
Muhabbat XO‘JAMURODOVA
