BAHORIY TAOMLAR KO‘RGAZMASI
Buxoro Iqtisodiyot va bank kollejida Navro‘z umumxalq bayrami arafasida “Orasta qizlar” ko‘rik-tanlovi o‘tkazildi.
Kollej o‘qituvchisi Dildora Jo‘rayeva boshchiligida tanlovga puxta tayyorgarlik ko‘rgan muassasaning birinchi bosqich o‘quvchilari tengdoshlaridan o‘zib ketishdi. Pazandalik sirlarini puxta egallagan qizlarning namoyish etgan ko‘rgazmalari barchada katta qiziqish uyg‘otdi. Ta’lim maskani malikalari tomonidan ijro etilgan sahna ko‘rinishlari, badiiy o‘qish, qo‘shiq va raqslar ham hakamlar tomonidan munosib baholandi. Ko‘rik-tanlov yakuniga ko‘ra Maftuna Jo‘rayeva birinchi, Shahzoda Xolmurodova ikkinchi, Madina Rahmatova uchinchi o‘rinni egalladi.
Shuningdek, kollejda bitiruvchi o‘quvchilarni ishga joylashtirish va tadbirkorlik sohasida ularga kredit ajratish bo‘yicha davra suhbati ham bo‘lib o‘tdi.
Oysha XO‘DOYBERDIYEVA
